ស្រប​ពេលដែល​មានការ​ខកចិត្ត​នៅ​ដើមរដូវ​កាល នេះ លោក Jose Mourinho នឹង​វិល​ទៅកាន់​ប្រទេស​ព័រ​ទុយ​ហ្គា​ល់​នា​រាត្រី​នេះ ខណៈដែល Chelsea ជួប​អតីត​ក្រុម​របស់លោក FC Porto ក្នុង​ក្របខ័ណ្ឌ Champions League​។​

​ក្លិប​មាន​មូលដ្ឋាន​នៅ​ទីក្រុង​ឡុង​ដ៍​មួយ​នេះ នឹង​សម្លឹង​រក​ជ័យជម្នះ​ជា​លើក​ទី​២​ក្នុងចំណោម​ការប្រកួត​ពូ​ល G ២​លើក ក្រោយពី​ការទទួល​ជ័យជម្នះ​យ៉ាង​កក់ក្តៅ​របស់​ពួកគេ​ក្នុង​លទ្ធផល ៤-០ លើ​ក្រុម Maccabi Tel-Aviv នៅ​កីឡដ្ឋាន Stamford Bridge កាលពី​២​សប្តាហ៍​កន្លងទៅ ប៉ុន្តែ ពួកគេ​ត្រូវតែ​ធ្វើ​ឲ្យ​ល្អប្រសើរ​ទៅលើ​ការបង្ហាញ​ពី​ទម្រង់​លេង​ដ៏ អន់​មួយ​ផ្សេងទៀត​ក្នុង​ក្របខ័ណ្ឌ Premier League កាលពី​ចុង​សប្តាហ៍​មុន​។

Chelsea ត្រូវតែ​ធ្វើការ​វាយបក​ដេញតាម​ពីក្រោយ​ដើម្បី​ដណ្តើមបាន​លទ្ធផល​ស្មើ ២-២ នៅពេល​ជួប​ក្រុម Newcastle United កាលពី​ថ្ងៃ​សៅរ៍ ខណៈដែល​ខ្សែបម្រើ​អន្តរជាតិ​ប្រេ​ស៊ី​ល Ramires និង Willian សុទ្ធសឹង​បាន​រក​គ្រាប់​បាល់​បញ្ចូល​ទី​ដើម្បី​សង្គ្រោះបាន​១​ពិន្ទុ សម្រាប់​ក្រុម​ម្ចាស់​ជើងឯក​អង់គ្លេស​មួយ​នេះ​។

​ក្រោយមក លោក Mourinho បាន​ទទួលស្គាល់ថា ទម្រង់​លេង​ក្នុង​តង់​ទី​១​នៅឯ​កីឡដ្ឋាន St James’ Park គឺជា​ទម្រង់​លេង​ដ៏​អន់​បំផុត​របស់ Chelsea ក្រោម​ការដឹកនាំ​របស់​លោក ហើយ​បាន​បញ្ជាក់ថា​៖ «​នៅពេលដែល​អ្នកមាន​ទម្រង់​លេង​ដ៏​អន់​ពី​កីឡាករ​ជាច្រើន វា​មិនអាច​ទៅរួច​ឡើយ​សម្រាប់​ក្រុម​មួយ​ក្នុងការ​ផ្តួល​ក្រុម​មួយ​នោះ »​។

​ប៉ុន្តែ ខណៈដែល​ក្រុម​តោ​ខៀវ​កំពុងតែ​ស្ថិតក្នុង​ចំណាត់ថ្នាក់​លេខ​១៥ ក្រោយពី​ឈ្នះ​ត្រឹមតែ​២​លើក​គត់​ពី​ក្នុងចំណោម​ការប្រកួត​ក្របខ័ណ្ឌ Premier League ៧​លើក ការធ្វើដំណើរ​ទៅកាន់​អតីត​ក្រុម​របស់ខ្លួន​គឺជា​ប្រភេទ​នៃ​ការប្រកួត ដែល​ធ្វើ​ឲ្យ​លោក Mourinho មានការ​រំភើប​។​

​វា​មិនមែនជា​លើក​ទី​១ ឡើយ​ដែល​លោក​បាន​វិល​ទៅកាន់ Porto បើ​គិត​ចាប់តាំងពី​ចាកចេញ​ពី​ក្លិប​យក្ស​របស់​ព័រ​ទុយ​ហ្គា​ល់​មួយ​នេះ ក្នុងនាម​ជា​វីរបុរស​ម្នាក់ ក្រោយពី​បាន​ដឹកនាំ​ឲ្យ​ពួកគេ​ឈ្នះ​ពាន Champions League កាលពី​ឆ្នាំ​២០០៤ តាមរយៈ​ការ​ផ្តួល​ក្រុម Monaco ៣-០ ក្នុង​វគ្គ​ផ្តាច់ព្រ័ត្រ​។

​កាលពី​ឆ្នាំមុន លោក​បាន​វិល​ទៅកាន់ Porto ក្នុងនាម​ជា​អ្នកចាត់ការ​ទូទៅ​របស់ Chelsea ខណៈដែល John Terry ជា​ប្រធាន​ក្រុម​របស់លោក ហើយ​ក្រុម​របស់លោក​បាន​ចាញ់ ២-១​។ កាលពី​ឆ្នាំ​២០០៧ គ្រាប់​បាល់​របស់ Andriy Shevchenko បាន​ជួយ​ឲ្យ​ពួកគេ​ដណ្តើមបាន​លទ្ធផល​ស្មើ ១-១ នៅ​កីឡដ្ឋាន Estadio do Dragao ដើម្បី​ជួយ​ឲ្យ Chelsea ឈ្នះ​ទាំងពីរ​ជើង ៣-២ ក្នុង​វគ្គ​១៦​ក្រុម​ចុងក្រោយ​។ ការប្រកួត​នៅ​រាត្រី​នេះ នឹង​ចាប់ផ្តើម​នៅ​ម៉ោង​១:៤៥​ទៀបភ្លឺ​៕

​ជំនួប​បី​លើកចុងក្រោយ​រវាង​ក្រុម​ទាំងពីរ​
26.11.09          FC Porto 0-1 Chelsea
16.09.09          Chelsea 1-0 FC Porto
07.03.07          Chelsea 2-1 FC Porto

​ប្រភព​៖ cambosport